NFF KUMUENZI YEKINI.

RAIS wa Shirikisho la Soka nchini Nigeria-NFF, Alhaji Aminu Maigari aliungana na familia ya nyota wa zamani wa timu ya taifa ya nchi hiyo Rashid Yekini katika dua maalumu ya kumuombea mchezaji huyo. Yekini alifariki Mei 4 mwaka huu akiwa na umri wa miaka 48 na kuzikwa muda mfupi baadae kutokana na sheria za dini ya kiislamu katika mji aliozaliwa wa Irra uliopo katika jimbo la Kwara nchini humo. Maigari amesema kuwa pamoja na kwamba mchezaji huyo hayupo tena duniani lakini ataendelea kukumbukwa daima kutokana na mchango wake aliotoa haswa katika mchezo wa soka. Na kuuenzi mchango huo NFF inaandaa mchezo maalumu wa kimataifa wa kirafiki dhidi ya timu ambayo itajulikana na baadae na fedha zitakazopatikana itapewa familia yake. Maigari pia aliongeza kuwa NFF inakusudia pia kuandaa michuano ya kila mwaka ya timu za vijana chini ya miaka 15 michuano ambayo itapewa jina la Yekini kama njia mojawapo ya kuuenzi mchango wake.