SINA TIMU - MOURINHO.

KOCHA wa klabu ya Real Madrid, Jose Mourinho ameponda kiwango kilichoonyeshwa na kikosi chake baada ya kukubali kipigo cha bao 1-0 nyumbani kwa timu ya Sevilla jana usiku. Madrid wamekuwa mwanzo mbaya msimu huu wakiwa wamejikusanyia alama nne katika michezo minne waliyocheza na kuwafanya kushika nafasi ya 10 katika msimamo wa Ligi Kuu nchini Hispania maarufu kama La Liga huku wakiwa wamepitwa kwa alama nane na mahasimu wao Barcelona ambao ndio wanaongoza msimamo huo. Mourinho ameonyesha kutofurahishwa na na kiwango cha wachezaji wake kwani wameshindwa kurekebisha makosa ambayo wanafanya katika baadhi ya michezo msimu huu. Kocha huyo ambaye pia amewahi kuinoa klabu ya Chelsea na Inter Milan ya Italia amesema kuwa kwasasa anaona hana kikosi kwakuwa wachezaji wachezaji wanakosa hamasa lakini atalifanyia kazi hilo ili michezo mingine wahakikishe wanafanya vizuri. Madrid watakuwa na kibarua kigumu Jumanne pale watakapowakaribisha mabingwa wa Ligi Kuu nchini Uingereza Manchester City katika mchezo wa kwanza wa makundi wa michuano ya Ligi ya Mabingwa Ulaya.