WENGER AWEWESEKA NA KIPIGO.

MENEJA wa klabu ya Arsenal, Arsene Wenger amekiri kupatwa na wasiwasi na pengo ambalo linaendelea kukua kati yake na timu zingine ambazo zinafukuzia taji la Ligi Kuu nchini Uingereza. Kauli hiyo ya Wenger imekuja kufuatia kikosi chake kuangukia pua kwa kupata kipigo cha bao 1-0 nyumbani kwa Norwich City jana ikiwa ni wa kwanza timu hiyo kupata mbele ya Arsenal toka mwaka 1992 na kusababisha kuporomoka kwa alama 10 nyuma ya vinara wa ligi hiyo Chelsea. Pia wanaonekana kushindwa kusogea katika nafasi nne za juu za msimamo wa ligi hiyo ambayo itawawezesha kukata tiketi ya kucheza michuano ya Ligi ya mabingwa Ulaya msimu ujao. Akihojiwa Wenger amesema kuwa kushindwa kwao kupunguza pengo la alama katika mchezo wao wa jana kumeanza kutishia kampeni yake ya kunyakuwa taji la ligi hiyo lakini amesisitiza kuwa atafanya kila awezalo ili kuhakikisha wanarudi katika kiwango chao ili waweze kushindana kutafuta nafasi za juu. Pamoja na kuonyesha kutofurahishwa na kiwango cha Lukas Podoski pamoja na safu ya ushambuliaji ya timu hiyo katika mchezo wa jana kocha huyo bado hajaweka bayana kama ataongeza mshambuliaji mwingine katika dirisha dogo la usajili Januari mwakani ili kuongeza nguvu katika kikosi chake.