MAMA YAKE ASHLEY COLE ADAI MWANAE YUKO MBIONI KUTIMKIA UFARANSA.

MAMA wa beki wa kimataifa wa Uingereza na klabu ya Chelsea Ashley Cole amesema kuwa nyota huyo atahamia klabu ya Paris Saint-Germain-PSG mwishoni mwa msimu huu. Cole alishindwa kuafikiana na klabu ya Chelsea kuhusu mkataba wake mpya baada ya kupewa mkataba wa mwaka mmoja na PSG wanajipanga ili kupata saini ya beki huyo. Mbali ya PSG, Manchester United nao pia wameonyesha nia ya kumsajili beki huy ambaye atakuwa mchezaji huru katika majira ya kiangazi mwakani. Mama yake Cole aitwae Sue Cole aliandika habari hiyo kuhusu kuhama kwa beki huyo kwenye mtandao wa kijamii wa Faceboook ambapo pia alithibitisha kuwa kocha PSG Carlo Ancelotti tayari amefanya mazungumzo na Cole. PSG ambayo inamilikiwa na matajiri wa Qatar wako tayari kumpa mkataba mnono Cole ili aweze kumalizia soka lake nchini Ufaransa huku mahusiano ya karibu aliyonayo mchezaji huyo na Ancelotti yakichagiza kuondoka kwa mchezaji huyo.