MURRAY ASHINDWA KUTAMBA KWA DJOKOVIC.

MCHEZA tenisi namba moja katika orodha za ubora duniani kwa upande wa wanaume, Novak Djokovic jana amefanikiwa kumfunga hasimu wake kwa mara ya nne kati ya saba walizokutana na hasimu wake Andy Murray na kusonga mbele katika michuano ya ATP World Tour. Djokovic ambaye ni raia wa Serbia alimfunga Murray ambaye ni raia wa Uingereza kwa 4-6 6-3 7-5 na kuonoza katika kundi A huku mpinzani wake huyo akisubiri hatma yake wakati atakapopambana na Wilfried Tsonga katika mchezo wa mwisho wa kundi hilo utakaochezwa Ijumaa. Tsonga alishindwa kutamba katika michuano hiyo ambayo inafanyika jijini London katika Uwanja wa O2 Arena baada ya kukubali kipigo cha 7-5 3-6 6-1 kutoka kwa Tomas Berdych. Kwa mwaka huu Djokovic amecheza na Murray mara saba ambapo kati ya hizo Murray ameshinda mara tatu moja wapo ikiwa fainali ya michuano ya wazi ya Marekani ambapo muingereza huyo alinyakuwa taji lake la kwanza la Grand Slam.