DROGBA APANIA KUFANYA KWELI GALATASARAY.

MSHAMBULIAJI nyota wa kimataifa wa Ivory Coast, Didier Drogba amepania kufanya kila analoweza kuisaidia klabu ya mpya ya Galatasaray na kukiri kuwa uamuzi wa kwenda Uturuki umechangiwa kwa kiasi kikubwa na meneja wa zamani wa klabu ya Chelsea. Drogba alibainisha kuwa kabla ya kukubali kutia saini ya kuichezea klabu hiyo yenye maskani yake jijini Istanbul aliomba ushauri kwa kocha wake wa zamani Jose Mourinho. Mbali na kuzungumza na Mourinho lakini pia nyota huyo alizungumza na mchezaji mwenzake wa Ivory Coast ambaye anacheza katika klabu hiyo Emmanuel Eboue na wote waliizungumzia vizuri klabu hiyo. Drogba amesema kuwepo kwake hapo na nyota wengine kama Eboue na Wesley Sneijder huo ni ujumbe tosha kwa timu kubwa barani Ulaya na kudai kuwa anataka kushinda taji lingine la Ligi ya Mabingwa Ulaya akiwa na timu hiyo.