MTANANGE BADO MBICHI KABISA - MOURINHO.

MENEJA wa klabu ya Real Madrid, Jose Mourinho amesisitiza kuwa mpambano wao wa Ligi ya Mabingwa dhidi ya Manchester United ambao pengine unaweza kuamua hatma ya kocha huyo kubakia nchini Hispania, kwamba bado haujaisha. Timu hizo mbili zilizota sare ya kufungana bao 1-1 katika mchezo wa kwanza wa michuano hiyo uliochezwa katika Uwanja wa Santiago Bernabeu matokeo ambayo yanaipa nafasi United katika mchezo wao wa marudiano utakaochezwa Machi 5 mwaka huu. Lakini Mourinho ambaye amewahi kushinda taji la michuano hiyo wakati akifundisha timu za Porto ya Ureno na Inter Milan ya Italia, alijinasibu kuwa timu yake itafunga tena mabao katika wa marudiano huko Old Traford. Mourinho amesema kuwa timu yake inaweza kupata mabao katika mchezo wao wa marudiano kwani timu nyingi zimeshafanya hivyo msimu huu na wao wanalijua hilo. Kocha huyo aliendelea kusema mchezo wa marudiano utakuwa ni wa kuviziana kwani atakayetangulia kushinda atajaribu kujilinda ili kuhakikisha bao hilo halirudi lakini anamatumaini mashabiki watafurahia dakika zingine tisini za mchezo baina ya timu hizo kama ilivyokuwa katika mchezo wa kwanza.