WATANO WAFA KATIKA AJALI YA NDEGE WAKIENDA KUTIZAMA MPIRA.

WATU watano wamekufa na wengine 12 kujeruhiwa wakati ndege iliyokuwa imebeba mashabiki wa soka ilipotua kwa dharura na kushika moto mashariki mwa jiji la Donetsk nchini Ukraine. Ndege hiyo aina ya Antonov AN-24 ilikuwa katika safari za ndani ikitokea Black Sea Resort huko Odessa ikiwa na abiria 40. Wakati ikitua kwa dharura ndege hiyo ilipitiliza katika barabara ya kutua katika uwanja wa ndege wa Donetsk ambap abiria karibu wote walifanikiwa kutoka wakati ndege hiyo ikishika moto. Watu 12 wameumia katika tukio hilo ambapo chanzo cha ajali hiyo bado hakijajulikana. Ndege hiyo ya injini mbili ilikuwa imebeba mashabiki waliokuwa wakisafiri kwenda kuangalia mchezo wa Ligi ya Mabingwa Ulaya kati ya Shakhtar Donetsk na Borussia Dortmund. Timu zote mbili zilisimama dakika moja kabla ya kuanza mchezo huyo ulioshia kwa sare ya mabao 2-2 kuwakumbuka waliopoteza maisha katika ajali hiyo.