NIGERIA WALIKUWA KAMA BRAZIL - SAMASSA.

GOLIKIPA namba moja wa timu ya taifa ya Mali, Mamadou Samassa amewafananisha wapinzani wao waliochuana nao katika nusu fainali ya michuano ya Mataifa ya Afrika-Afcon na mabingwa mara tano wa Kombe la Dunia Brazil. Kauli ya Samassa imekuja baada ya timu yake kukubali kipigo cha mabao 4-1 kutoka kwa Nigeria inayojulikana kama Super Eagles katika mchezo uliofanyika jijini Durban, Afrika Kusini. Samassa mwenye umri wa miaka 22 ambaye anacheza katika klabu ya Guingamp ya Ufaransa amesema hawastahili kulaumiwa kwasababu wamekutana na timu iliyokuwa katika kiwango bora na wangeweza kuiondosha timu yoyote ambayo wangekutana nayo. Golikipa huyo anadhani walifanya kila waliloweza na kufundishwa na kocha wao lakini ukweli unabaki kwamba walikutana na timu bora iliyokuwa katika kiwango kizuri ndio maana wakashindwa kupata matokeo waliyohitaji. Mali inatarajiwa kupambana na Ghana katika mchezo wa kutafuta mshindi wa tatu utakaofanyika Jumamosi Februari 9 katika Uwanja wa Nelson Mandela Bay uliopo jijini Port Elizabeth.