FEDERER, NADAL KUKUTANA ROBO FAINALI HUKO CALIFORNIA.

MCHEZAJI nyota wa tenisi, Roger Federer amefurahishwa kurejea kwa hasimu wake wa muda mrefu Rafael Nadal katika ziara ya ATP ambapo wawili hao wanaweza kukutana katika hatua ya robo fainali ya michuano wazi ya BNP Paribas huko Indian Wells, California nchini Marekani. Nadal ambaye ni raia wa Hispania ameporomoka mpaka nafasi ya tano katika orodha za ubora duniani baada ya kukaa nje kwa kipindi cha miezi saba mwaka jana kutokana na majeraha ya mguu wake wa kushito yaliyokuwa yakimsumbua. Akizungumza na waandishi wa habari Federer ambaye ni raia wa Switzerland amesema amefurahishwa kumuona hasimu wake huyo jana baada ya kumaliza mazoezi kwani hawakuwa wakiwasiliana mara kwa mara toka alipoumia katika michuano Wimbledon mwaka jana. Nadal anatinga katika michuano hiyo kwa kujiamini baada ya kunyakuwa taji la michuano ya wazi ya Mexico iliyofanyika jijini Acapulco Jumapili iliyopita.