VALDES ALA KIBANO CHA KUFUNGIWA MECHI NNE.

KLABU ya Barcelona imetangaza katika mtandao wake kwamba itakosa huduma ya golikipa wake namba moja Victor Valdes ambaye amefungiwa mechi nne kufuatia kipigo cha mabao 2-1 ilichopata timu hiyo dhidi ya Real Madrid mwishoni mwa wiki iliyopita. Valdes alipewa kadi nyekundu baada ya kumshambulia mwamuzi Miguel Angel Perez Lasa baada ya kukataa kuwapa Barcelona penati katika dakika za lala salama za mchezo huo. Hata hivyo, katika taarifa yake Barcelona wamesema kuwa hawatakubali adhabu aliyopewa golikipa huyo na timu ya wanasheria wa klabu hiyo watakata rufani kuhusiana na uamuzi huo siku chache zijazo. Kama rufani yake ikikataliwa Valdes atakosa mechi kadhaa za Ligi Kuu nchini Hispania maarufu kama La Liga ikiwemo michezo dhidi ya Deportivo La Coruna, Rayo Vallecano, Celta de Vigo na Real Mallorca.