TUTAZIMA NDOTO ZA ARSENAL KUSHIRIKI CHAMPIONS LEAGUE - ADEBAYOR.

MSHAMBULIAJI nyota wa klabu ya Tottenham Hotspurs, Emmanuel Adebayor amesisitiza kuwa wako tayari kuzima ndoto za klabu ya Arsenal kushiriki michuano ya Ligi ya Mabingwa Ulaya msimu ujao na ana matumaini kuwa klabu yake itamaliza katika nafasi nne za juu. Kikosi cha Spurs ambacho kinanolewa na Andre Villas-Boas kwasasa kipo katika nafasi ya tano mwa msimamo wa Ligi Kuu nchini Uingereza wakiwa alama moja nyuma ya mahasimu wao Arsenal huku wakiwa wamebakiwa na mechi mbili. Kama Arsenal wakifanikiwa kushinda mechi zao mbili zilizobakia hakuna watakuwa hawana shaka ya kujikatia tiketi ya kushiriki michuano hiyo ya Ulaya msimu ujao huku wakiwaacha mahasimu wao wakienda kushiriki michuano ya Europa League. Hata hivyo Adebayor ana matumaini kuwa mahasimu wao hao watapoteza alama katika mechi zao zilizobakia na hiyo itakuwa nafasi pekee kwao kuhakikisha wanashinda mechi zao ili kumaliza katika nafasi nne za juu kwenye msimamo wa ligi hiyo. Adebayor ambaye amekaa Arsenal kwa kipindi cha miaka mitatu amesema kwasasa hajali chochote kuhusu klabu yake hiyo ya zamani kwani mawazo yake na nguvu zake zote amezihamishia Spurs alipo sasa.