ANZHI YAMUONGEZA HIDDINK MWAKA MMOJA ZAIDI.

MENEJA wa Mholanzi wa klabu ya Anzhi Makhachkala Guus Hiddink ameongezwa mkataba wa mwaka mmoja na klabu hiyo tajiri baada ya kufanikiwa kumaliza katika nafasi ya tatu katika msimamo wa Ligi Kuu nchini Urusi. Klabu hiyo ilituma taarifa katika mtandao wake wamethibitisha kuwa wamemuongeza mkataba kocha huyo mwenye umri wa miaka 66 lakini hawakuweka wazi kiasi ambacho atakuwa akilipwa katika mkataba huo mpya. Anzhi imekuwa ikitumia mamilioni ya fedha kwa ajili ya kuvutia nyota wa kimataifa kama nahodha wao Mcameroon Samuel Eto’o na kumaliza katika nafasi hiyo kutaongeza mvuto kwasababu watashiriki michuano ya Ligi ya Mabingwa Ulaya msimu ujao. Mbali na kumaliza katika nafasi ya tatu kwenye msimamo wa ligi lakini pia walifanikiwa kufika fainali ya Kombe la Ligi kabla ya kupoteza mbele ya CSKA Moscow.