BINGWA NBA SASA KUAMULIWA KATIKA FAINALI YA MWISHO ALHAMISI.

MCHEZAJI nyota mwenye thamani zaidi katika Ligi ya Kikapu ya Marekani-NBA, LeBron James alfajiri ya kuamkia leo ameisaidia timu yake ya Miami Heat kupambana na kufanikiwa kuifunga timu ya San Antonio Spurs kwa vikapu 103-100 na kupelekea bingwa wa ligi hiyo sasa kuamuliwa katika fainali ya mwisho itakayopigwa Juni 21 mwaka huu. Nyota huyo ambaye aliisadia timu yake katika robo ya mwisho ya mchezo huo alifanikiwa kumaliza kwa kufunga vikapu 31, kutoa pasi za mwisho 11, pamoja na kudaka rebound 10. Ushindi huo wa Miami umepelekea fainali hiyo sasa kuamualiwa katika mchezo wa saba na wa mwisho baada ya kufungana michezo 3-3 kwenye mechi sita za fainali walizokutana. Fainali hiyo ya mwisho itachezwa Alhamisi usiku kwa saa za Marekani ambapo huku kwetu itakuwa alfajiri ya siku ya Ijumaa katika uwanja wa Miami uitwao American Airlines Arena.