FIFA YAWATAKA MASHABIKI KUCHUKUA TIKETI ZAO MAPEMA.

SHIRIKISHO la Soka Duniani-FIFA na kamati ya maandalizi imewataka mashabiki wa soka nchini Brazil kuchukua tiketi zao za michuano ya Kombe la Shirikisho mapema ili kuepusha foleni ndefu siku ya mchezo. Wakati wafanyakazi bado wakimalizia hatua za mwisho mwisho katika viwanja kabla ya michuano hiyo kuanza, sasa inaonekana kuwa suala tiketi limekuwa tatizo lingine kubwa. Katibu Mkuu wa FIFA, Jerome Valcke amesema kuwa kuna maelfu ya watu waliolipia tiketi zao lakini bado hawajazichukua hivyo wanahitajia kuzichukua mapema ili kuepusha usumbufu wa kukaa katika foleni ndefu. Valcke amesema nchini Brazil ni tofauti na Ulaya kwani huko watu wakishalipia tiketi zao huwa wanataka kuzichukua mapema lakini hali ni tofauti na nchimi humo kwani watu hupenda kuchukua tiketi zao dakika za mwisho kabla ya mchezo kuanza. Kiongozi huyo alidai kuwa wanahimiza watu kuchukua tiketi zao mapema kwa sababu za kiusalama.