ETHIOPIA YANYANG'ANYWA POINT.

SHIRIKISHO la Soka Duniani-FIFA limetangaza kuinyang’anya alama tatu Ethiopia baada ya kuwakuta na hatia ya kumchezesha Minyahile Teshome Beyene aliyekuwa na kadi mbili za njano katika mchezo wa kufuzu michuano ya Kombe la Dunia dhidi ya Botswana. Taarifa zimeipa matumaini Afrika Kusini ambao matumaini yao ya kufuzu michuano hiyo yalikuwa yamefifia baada ya kufungwa na Ethiopia kwa mabao 2-1 jijini Addis Ababa mwezi uliopita. Katika taarifa ya FIFA iliyotumwa katika mtandao ilithibitisha kuipoka alama Ethiopia na kuipa ushindi wa mabao 3-0 Botswana. Pamoja na kunyang’anywa alama hizo Ethiopia itabakia kileeni mwa kundi A wakifuatiwa na Afrika Kusini waliopo nafasi ya pili huku timu zote hizo zikiwa na nafasi ya kwenda hatua inayofuata kama wakishinda mechi zao za mwisho. Afrika Kusini italazimika kushinda`mchezo wao wa mwisho dhidi ya Botswana watakaocheza kwao Septemba mwaka huu huku wakiomba Afrika ya Kati washinde au watoe sare na Ethiopia ili kupata nafasi hiyo.