UFARANSA, URUGUAY KUONYESHANA KAZI KOMBE LA DUNIA U20.

WAKATI pazia la michuano ya Kombe la Dunia kwa vijana chini ya umri wa miaka 20 likikaribia kufungwa kumebaki mchezo mmoja wa fainali ambao utazikutanisha timu ya taifa ya Ufaransa na Uruguay. Fainali baina ya timu hizo inatarajiwa kupigwa jijini Instabul, Uturuki ambapo kila timu itakuwa ikiwania kushinda taji lake la kwanza la michuano hiyo kwa vijana wenye umri huo. Ufaransa ambayo ilikuwa haipewi nafasi kubwa ya kufanya vizuri katika michuano hiyo baada ya kumaliza katika nafasi ya tatu kwenye hatua za kufuzu, ilifanikiwa kuchanja mbuga kwa kuongoza kundi lao na kuwabwaga wenyeji Uturuki na Azbekistan kabla ya kuwaondoa wawakilishi pekee waliobakia Ghana katika hatua ya nusu fainali. Uruguay nayo ilikuwa ya kusuasua kuanzia hatua ya makundi kwa kufunga mabao katika dakika za majeruhi dhidi ya Nigeria na baadae kufunga bao la ushindi katika dakika za nyongeza katika mchezo dhidi ya Hispania kabla ya kuindosha Iraq kwa changamoto ya mikwaju ya penati katika hatua ya nusu fainali.