VAN GINKEL AMEFANYA MAKOSA KWENDA CHELSEA - OVERMARS.

MKURUGENZI wa Michezo wa klabu ya Ajax Amsterdam, Marc Overmars anaamini kuwa kiungo nyota chipukizi Marco van Ginkel alitakiwa kujiunga na klabu yake badala ya Chelsea kama alivyofanya. Kiungo huyo mwenye miaka 20 alikamilisha usajili wake akitokea Vitesse kwa ada ya euro milioni 9.3 na inaaminika kuwa Ajax nao walikuwa wakimendea saini ya kinda huyo. Overmars ambaye amewahi kucheza katika klabu ya Arsenal enzi zake anaamini kuwa kinda huyo hakufanya uchaguzi sahihi kwenda Chelsea badala yake angekwenda Ajax ili kipaji chake kiweze kukua zaidi. Nyota huyo wa zamani aliendelea kudai kuwa ilikuwa ni mapema mno kwake kwenda Chelsea kwa hivi sasa kwani alihitaji kukomaa zaidi akiwa karibu na familia yake kabla ya kwenda Uingereza.