WEST BROM NIMEFIKA - ANELKA.

MSHAMBULIAJI wa zamani wa kimataifa wa Ufaransa, Nicolas Anelka amebainisha kuwa yuko tayari kustaafu kucheza soka akiwa klabu ya West Bromwich Albion baada ya timu hiyo kumsajili kwa mkataba wa mwaka mmoja. Anelka mwenye umri wa miaka 34, amewahi kucheza katika vlabu mbalimbali vikiwemo Arsenal, Chelsea, Liverpool, Paris Saint-Germain na Real Madrid lakini hivi sasa amedai kuwa ameamua kutulia katika klabu hiyo na kustaafu akiwa hapo. Anelka amesema kutokana na umri hivi sasa anataka kufurahia kucheza na anadhani West Brom ndio chaguo sahihi kwake na watajitahidi kufanya vyema katika ligi kuliko msimu uliopita. Nyota huyo aliendelea kudai kuwa wakati akiwa Chelsea ilikuwa ni ngumu kuifunga klabu hiyo na sasa anaamini kwa uwezo wake ataiwezesha timu hiyo kuendelea kuzipa wakati mgumu timu vigogo vya Ligi Kuu.