ANCELOTTI AHOFIA SAFU YAKE YA ULINZI.

MENEJA mpya wa klabu ya Real Madrid, Carlo Ancelotti ameonyesha kutoridhishwa na ushindi wa mabao 2-1 iliyopata timu yake dhidi ya Real Betis katika mchezo wa kwanza wa Ligi Kuu nchini Hispania maarufu kama La Liga. Ancelotti alieleza kuwa hakufurahishwa na safu yake ya ulinzi katika mchezo huo na kumtaja golikipa Diego Lopez aliyeanza katika mchezo huo na wachezaji wengine kwamba wanaweza kujikuta wakikosa namba katika kikosi cha kwanza kwenye mchezo ujao. Kocha huyo raia wa Italia alidai kuwa katika mchezo huo alichagua kumuanzisha Lopez lakini kwa jinsi alivyocheza hadhani kama katika mchezo unaokuja atakuwa na nafasi hiyo pamoja na baadhi ya mabeki wake. Wakati Ancelotti akilalama na timu yake, mahasimu wao Barcelona wameanza vyema kutetea taji lao kwa kuwagaragaza Levante kwa mabao 7-0 yaliyofungwa na Alex Sanchez, Dani Alves, Pedro, Xavi Hernandez na Lionel Messi aliyepiga mawili.