MILAN NI ZAIDI YA BALOTELLI - COCU.

MENEJA wa klabu ya PSV Eindhoven, Philip Cocu amesisitiza kuwa kikosi chake kinahitaji kujituma zaidi ya kumzuia Mario Balotelli wakati watakapoikaribisha AC Milan kwa ajili ya kutafuta nafasi ya kuingia hatua ya makundi katika Ligi ya Mabingwa Ulaya. Mshambuliaji huyo wa kimataifa wa Italia amekuwa aking’aa toka atue San Siro akitokea Manchester City Januari lakini Cocu amempuuzia na kudai kuwa wako wachezaji wengine wa Milan ambao wanaweza kuwaletea madhara katika mchezo wao huo wa mkondo wa kwanza. Akihojiwa kuhusiana na mchezo huo Cocu amesema sio kwamba watajariabu kumzuia Balotelli asiwaletee madhara bali wanatakiwa kuwafunga Milan katika mechi mbili watakazokutana na hilo ndio lengo, kazi na changamoto waliyonayo. PSV ambao ni mabingwa wa Uholanzi wameondokewa na wachezaji kadhaa katika kipindi cha usajili wa majira ya kiangazi akiwemo Dries Mertens, Kevin Strootman na Erik Pieters lakini Cocu ana uhakika wachezaji watakaoziba nafasi hizo kama Adam Maher waliyemsajili kwa euro milioni nane watafanya vyema.