NADAL ATINGA NUSU FAINALI YA US OPEN KWA KISHINDO.

MCHEZAJI tenisi nyota Rafael Nadal ameendeleza ubabe katika michuano ya wazi ya Marekani baada ya kumgaraza Mhispania mwenzake Tommy Robredo na kutinga hatua ya nusu ya michuano hiyo inayofanyika jijini New York. Nadal ambaye ni bingwa wa michuano hiyo mwaka 2010, alifanikiwa kumfunga Robredo ambaye alimng’oa Roger Federer katika mzunguko wa nne kwa 6-0 6-2 6-2. Sasa Nadal mwenye umri wa miaka 27 atakwaana na Richard Gasquet katika nusu fainali baada ya Mfaransa huyo kumng’oa David Ferrer. Akihojiwa mara baada ya mchezo huo Nadal anayeshika namba mbili katika orodha za ubora duniani kwa upande wanaume, amesema anadhani hiyo ndio ilikuwa mechi yake bora kabisa katika michuano hiyo na ana mategemeo ya kuendelea kucheza katika kiwango hicho kwenye mechi zijazo.