ULIKUWA NI UHAMISHO ULIOVUTA HISIA ZANGU - WAKALA WA BALE.

WAKALA wa mshambuliaji nyota wa kimataifa wa Wales, Gareth Bale amedai kuwa uhamisho wa mchezaji huyo kwenda Real Madrid ulivuta hisia zake kwa kiasi kikubwa. Nyota huyo wa zamani wa klabu ya tottenham Hotspurs alifanikiwa kuweka rekodi ya uhamisho wa euro milioni 100 na kumaliza uvumi uliokuwa umezagaa juu ya mstakabali wake. Wakala huyo Jonathan Barnett aliliambia gazeti la The Daily Telegraph kuwa mpango huo ndio uliofanikiwa zaidi kati ya yote ambayo amekuwa akiijadili. Barnett amesema amekuwa akihusika uhamisho mgumu zaidi kwa miaka kadhaa ambayo amekuwa akifanya shughuli hizo lakini uhamisho wa Bale ndio uliofanikiwa zaidi na anashukuru kuwa sehemu ya tukio hilo la kihistoria. Wakala huyo aliendelea kudai kuwa wakati Bale ana miaka 16 alimwambia kuwa anataka kucheza Real Madrid hivyo kutimiza ndoto zake ni kitu kilichovuta sana hisia zake.