BAYERN YAICHAPA GUANGZHOU.

KLABU ya Bayern Munich imejihakikishia nafasi ya kucheza fainali ya michuano ya Klabu ya Bingwa ya Dunia baada ya kuwagaragaza mabingwa wa bara la Asia timu ya Guangzhou Evergrande. Mabao ya Bayern katika mchezo huo yalifungwa na Franck Ribery katika dakika ya 40 na Mario Mandzukic aliyeongeza bao la pili kabla ya muda wa mapumziko akimalizia mpira wa kichwa uliopigwa na Thiago Alcantara. Bao la tatu la Bayern lilifungwa na kiungo mahiri Mario Gotze aliyefunga bao hilo dakika mbili baada ya kutoka mapumziko na kuihakikishia ushindi timu yake. Bayern sasa itasubiri mshindi kati ya mabingwa wa Amerika Kusini timu ya Atletico Mineiro au wenyeji wa michuano hiyo Raja Casablanca mchezo ambao unatarajiwa kuchezwa baadae leo.