BAYERN KUELEKEA QATAR KWA MAANDALIZI YA MSIMU WA PILI WA LIGI.

MABINGWA wa Ulaya na Dunia klabu ya Bayern Munich ya Ujerumani wanatarajia kuelekea nchini Qatar Jumapili kwa ajili ya kambi ya kipindi cha majira ya baridi. Mwenyekiti wa Bayern Karl-Heinz Rummenigge amesema wameamua kwenda Qatar kwasababu watapata kila kitu kwa ajili ya maandalizi yao. Timu hiyo haijafanya mazoezi toka walipoigaragaza Raja Casablanca jijini Marrakech na kunyakuwa Kombe la Klabu ya Dunia Desemba 21 mwaka jana kufikisha jumla ya mataji matano waliyonyakuwa katika kipindi cha mwaka 2013 huku mengine yakiwa ya Ligi ya Mabingwa barani Ulaya, Bundesliga, Kombe la Ujerumani na Supe Cup. Bayern ambao wananolewa na Pep Guardiola wanatarajiwa kucheza mchezo wa kirafiki dhidi ya mabingwa wa soka nchini Sudan Al-Merrikh jijini Doha Januari 9 na wakati wakirejea nchini Ujerumani watasimama nchini Kuwait kwa ajili ya mchezo mwingine wa kirafiki dhidi ya Kuwait SC Januari 13. Kwasasa Bayern ndio wanaongoza Bundesliga kwa tofauti ya alama saba mbele Bayer Leverkusen wanaoshika nafasi ya pili.