FERGUSON ALINIKATAZA KWENDA ITALIA KWASABABU YA UBAGUZI - POGBA.

KIUNGO wa klabu ya Juventus ya Italia, Paul Pogba amebainisha kuwa alikuwa na ndoto za kucheza katika timu za Barcelona ya Hispania au Arsenal ya Uingereza lakini akaongeza kuwa ana furaha na maisha ndani ya klabu yake ya sasa. Nyota huyo wa kimataifa wa Ufaransa alijiunga na Juventus akitokea Manchester United mwaka 2012 na toka kipindi hicho amekuwa mchezaji tegemeo wa mabingwa hao wa Serie A. Kumekuwa na tetesi kuwa angehamia klabu ya Paris Saint-Germain na habari hizo kuthibitishwa na timu kwamba wanataka kumsajili mchezaji huyo mwishoni mwa msimu lakini ana furaha kucheza chini ya kocha Antonio Conte kwasasa. Akihojiwa Pogba mwenye umri wa miaka 20 amesema anajisikia furaha kuichezea Juventus ingawa hawezi kukataa kuwa alikuwa na ndogo za kucheza Barcelona au Arsenal wakati akiwa mtoto. Pogba pia alienda mbali na kuelezea uamuzi wake wa kujiunga na Juventus huku akidai kuwa Sir Alex Ferguson aliyekuwa kocha United wakati huo alimshauri kutokwenda Italia kutokana na ubaguzi wa rangi lakini hakujali sana suala hilo kwasababu ni tatizo la dunia nzima.