MOURINHO AKIRI OSCAR ALISTAHILI KADI YA NJANO.

MENEJA wa klabu ya Chelsea, Jose Mourinho amekiri kuwa kiungo wake Oscar alistahili kadi ya njano kwa kujirusha katika ushindi wa mabao 3-0 waliopata dhidi ya Southampton jana. Mourinho alimshambulia mshambuliaji wa Liverpool Luis Suarez kwa kujirusha kwenye mchezo wao ambao walishinda katika Uwanja wa Stamford Bridge na hakuwa na pingamizi kwa kadi aliyopewa Oscar kwa kujirusha. Kocha huyo amesema mwamuzi wa mchezo huo Martin Atkinson alifanya jambo sahihi kumpa kadi ya njano Oscar kwa kosa hilo. Mourinho aliendelea kudai kuwa golikipa alikuwa anakuja kumfuata halafu akasimama hivyo Oscar akajaribu kujigusisha kwa kipa huyo badala ya yeye kuguswa hivyo mwamuzi alikuwa sahihi. Mourinho pia amedai amekubaliana na maelezo ya Oscar ambaye baada ya kumuona kipa akija alitegemea kupata penati pamoja na kadi nyekundu kwa kipa huyo lakini alimzidi ujanja kutokana na uzoefu wake.