DROGBA AKAA KIMYA KUHUSU TETESI ZA KWENDA MAREKANI.

MSHAMBULIAJI nyota wa klabu ya Galatasaray, Didier Drogba amenyamaza kimya kuhusu tetesi kuwa ana mpango wa kutimkia katika timu ya Seattle Sounders baadae mwaka huu. Nyota huyo wa zamani wa Chelsea alijiunga na timu hiyo ya Uturuki akitokea klabu ya Shanghai Shenhua ya China mwaka mmoja uliopita na kuisadia timu hiyo kutinga hatua ya timu 16 bora katika michuano ya Ligi ya Mabingwa barani Ulaya. Katika wiki za hivi karibuni, nyota huyo wa kimataifa wa Ivory Coast amekuwa akihusishwa na tetesi za kuhamia Ligi Kuu nchini Marekani, MLS na kuungana na kina Obafemi Martins huko Seattle lakini Drogba amewaambia mashabiki kuwa nia yake ni kucheza kwa nguvu zake zote akiwa Galatasaray. Drogba amesema mambo mengi yamekuwa yakisemwa katika siku kadhaa zilizopia lakini kwa kawaida yeye huwa hababaishwi na tetesi hizo na haiwezi kuwa mara ya kwanza wala ya mwisho kufanya hivyo. Nyota huyo amesema malengo yake ni kuhakikisha anatengeneza historia akiwa na timu hiyo hivyo hakuna chochote kinachoweza kumbadilisha asifikie anapotaka.