WENGER AWATAKA WACHEZAJI KUWA NGANGARI KAMA WANATAKA UBINGWA.

MENEJA wa klabu ya Arsenal, Arsene Wenger amewapa changamoto wachezaji wake kujiamini katika mbio za ubingwa wa Ligi Kuu nchini Uingereza wakati huu ambapo wanaingia katika kipindi kigumu. Mwezi huu Arsenal inakabiliwa na mechi ngumu ambapo Jumamosi hii wanakabiliwa na mechi ngumu ya ugenini dhidi ya Liverpool ambapo ushindi utawafanya wajikite kileleni mwa msimamo wa ligi hiyo. Kikosi cha Wenger kilirejea kileleni baada ya Manchester City wanaoshika nafasi ya pili kushindwa kukwea baada ya kukubali kipigo cha bao 1-0 kutoka kwa Chelsea Jumatatu. Arsenal ambao wako kileleni kwa tofauti ya alama mbili, wamekuwa wakipondwa na wadau wa soka ambao hawaamini kama timu hiyo inaweza kumaliza ukame wa mataji ambao wamekuwa nao kwa miaka tisa. Lakini Wenger ana imani na wachezaji wake kuwa wako tayari kuhakikisha wanaleta mataji Emirates na ratiba yao ya mwezi huu ndio nafasi pekee ya kutuma ujumbe kwa mahasimu wao.