KOCHA MWANAMKE ATEULIWA KUFUNDISHA TIMU YA WANAUME HUKO UFARANSA.

HELENA Costa wa Ureno amekuwa mwanamke wa kwanza kufundisha timu ya wanaume barani Ulaya baada ya kuteuliwa kuwa kocha wa timu ya Clermont Foot ya Ufaransa. Costa ambaye alikuwa mng’amuzi wa vipaji wa klabu ya Celtic amekuwa akifundisha timu ya taifa ya wanawake ya Iran toka mwaka 2012. Mwanamama huyo mwenye umri wa miaka 36 ambaye amewahi pia kuifundisha timu ya vijana na Benfica na timu ya taifa ya wanawake ya Qatar atajiunga rasmi na Clermont mwishoni mwa msimu huu. Kabla ya Costa kujiunga na timu hiyo ya daraja la pili mwanamke mwingine aliyekuwa akifundisha timu ya wanaume barani humo ni Carolina Morace ambaye alichukua mikoba ya kuinoa timu ya Serie C ya Viterbese kwa mechi mbili mwaka 1999.