MAYWEATHER AMSHINDA MAIDANA NA KUENDELEA REKODI YA KUTOPIGWA.

BONDIA mahiri Floyd Mayweather wa Marekani amefanikiwa kumtandika kwa alama Marcos Maidana wa Argentina katika pambano la uzito wa Welter lililofanyika jijini Las Vegas na kufanya bondia kuendeleza rekodi ya kutopigwa katika mapambano 46 aliyocheza. Mayweather ambaye sasa ni bingwa wa dunia wa mikanda ya WBC na WBA alikuwa akipewa nafasi kubwa kushinda pambano hilo kirahisi lakini hali ilikuwa tofauti kutokana na Maidan kuonyesha kujiandaa vyema na kuleta upinzani mkubwa. 

Katika majaji watatu waliokuwa wakitoa alama katika pambano hilo wawili walimpa ushindi Mayweather kwa alama 117-111 na 116-112 huku mmoja akitoa alama sawa kwa mabondia wote wawili alama 114-114. Akihojiwa mara baada ya pambano hilo, Mayweather amesema lilikuwa pambano gumu haswa alipopigwa maeneo ya karibu na jicho hivyo kumfanya raundi mbili za mwanzoni kutoona vizuri lakini anashukuru amewapa mashabiki wake alichokitaka. Kwa upande wa Maidana yeye ameomba pambano la marudiano huku akilalama kuwa pambano hilo alishinda lakini majaji walimwangusha kwa kumpa mpinzani wake alama nyingi.