KOMBE LA DUNIA 2014: PAMOJA NA KUSHINDWA KUIFUNGA MEXICO, SCOLARI APONGEZA KIKOSI CHAKE KWA KUCHEZA VYEMA.

UMAHIRI wa golikipa wa Mexico, Guillermo Ochoa ulimaliza ubabe wa Brazil kushinda mechi 10 mfululizo, lakini wakati mashabiki wakikasirishwa na timu kutofunga mabao, kocha Luiz Felipe Scolari amesema kikosi chake kinaimarika katika kila mechi. Akihojiwa Scolari amesema kwa mawazo yake kikosi chake kimecheza kwa asilimia 10 zaidi ya walivyocheza dhidi ya Croatia. Kocha huyo aliendelea kudai kuwa kikosi chake kinafanya vizuri nab ado wana safari ndefu ila amefurahishwa na alichokiona uwanjani jana. Brazil iliifunga Croatia kwa mabao 3-1 katika mchezo wao wa ufunguzi uliochezwa Alhamisi iliyopita huku Mexico nao wakipata ushindi dhidi ya Cameroon siku moja baadae kabla ya kugawana alama katika mchezo wa jana. Scolari amesema nchini Brazil watu wanaamini wachezaji wengine sio bora kama wachezaji wao na walidhani Mexico hawakuwa vizuri lakini jana walicheza vizuri kama ilivyokuwa kwao.