ARSENAL YAMUUZA KIUNGO WAKE FULHAM.

KLABU ya Arsenal imetangaza kuwa kiungo wa kimataifa wa Ujerumani Thomas Eisfeld amejiunga na klabu ya Fulham kwa ada ambayo hawakuiweka wazi. Kiungo huyo mwenye umri wa miaka 21 alisajiliwa Arsenal akitokea shule ya Borussia Dortmund Januari mwaka 2012. Pamoja na kuwa mchezaji wa kudumu katika kikosi cha vijana cha Arsenal, Eisfeld pia amefanikiwa kucheza mechi mbili katika kikosi cha kwanza. Chipukizi huyo alicheza katika mechi ya Kombe la Ligi ambayo Arsenal walishinda mabao 7-5 dhidi ya Reading Octoba 30 mwaka 2012, huku akifunga bao katika mchezo wake wa pili wa michuano hiyo dhidi ya West Bromwich Albion msimu uliopita. Katika taarifa ya klabu iliyotumwa katika mtandao wake imemshukuru mchezaji huyo kwa mchango wake alioutoa na kumtakia kila la kheri katika maisha yake mapya huko Fulham.