RODRIGUEZ HANA MUDA MREFU WA KUKAA MONACO - WENGER.

MENEJA wa klabu ya Arsenal, Arsene Wenger anaamini kuwa James Rodriguez ataihama Monaco katika misimu miwili ijayo kwasababu anadhani sio mchezaji anayefaa kuichezea klabu hiyo ya Ufaransa kutokana na kiwango chake. Nyota huyo mwenye umri wa miaka 22 amekuwa akihusishwa kwa kiasi kikubwa kuhamia Real Madrid huku Monaco ikimthaminisha kwa kiasi cha euro milioni 89 baada ya kung’ara katika Kombe la Dunia akiwa na Colombia. Rodriguez alifunga mabao sita yaliyomuwezesha kuibuka mfungaji bora na kuchukua kiatu cha dhahabu, amekuwa akiivutia pia Manchester United lakini Wenger anaamini kuwa mchezaji anaweza asiondoke Monaco msimu huu kutokana na kufuzu kucheza michuano ya Ligi ya Mabingwa barani Ulaya. Wenger amesema ni vigumu sana kumshawishi mchezaji kama Rodriguez kubakia huku ukiwa na timu kama Real Madrid na Barcelona zikiwa zinawinda wachezaji nyota kwa ajili ya kuimarisha vikosi vyao. Rodriguez alijiunga na Monaco akitokea Porto kwa ada ya euro milioni 76 mwaka jana na kufunga mabao 10 katika mashindano yote msimu uliopita.