VAN GAAL AANZA KUTENGENEZA SABABU ZA KUFUNGWA.

MENEJA wa klabu ya Manchester United Louis van Gaal amelalamikia ratiba ndefu ya ziara ya kujiandaa na msimu mpya nchini Marekani kwa kudai kuwa haisaidii maandalizi yao ya ligi. United inatarajiwa kucheza klabu ya Los Angeles Galaxy katika Uwanja wa Rose Bowl huko Pasadena leo nab ado wana mechi zingine tatu zaidi katika miji ya Denver, Washington na Detroit ikiwa ni sehemu ya Kombe la Michuano ya Kimataifa. Wanaweza kucheza mechi ya nne jijini Miami Agosti 4 kama wakifanikiwa kufika fainali baada ya kucheza mechi dhidi ya AS Roma, Inter Milan na Real Madrid. Akihojiwa Van Gaal amesema wanapaswa kujiandaa na msimu na wakati wana shughuli nyingi za kibiashara na kusafiri safari ndefu kwa ndege sio jambo jema kwa maandalizi yao. Kocha huyo awa zamani wa Barcelona, Bayern Munich na Ajax Amsterdam ndio kwanza amechukua mikoba ya kuinoa United mwezi huu baada ya kuiongoza Uholanzi kushika nafasi ya tatu katika michuano ya Kombe la Dunia nchini Brazil.