WEST BROM YAVUNJA REKODI YA USAJILI KWA NYOTA WA NIGERIA.

KLABU ya West Bromwich Albion imefanikiwa kunasa saini ya mshambuliaji nyota wa kimataifa wa Nigeria Brown Ideye kwa ada inayokadiriwa kufikia paundi milioni 10. Klabu hiyo ilitangaza usajili wa mshambuliaji huyo mwenye umri wa miaka 25 akitokea timu ya Dynamo Kiev jana na kudai kuwa wamevunja rekodi ya klabu katika usajili. Ideye anakuwa mchezaji wa tano kusajiliwa na klabu hiyo ikiwa ni sehemu ya harakati zao za kuimarisha kikosi kwa ajili ya msimu mpya wa Ligi Kuu. Kocha wa Albion alisifia usajili wa Ideye na kudai kuwa ni mchezaji ambaye kila kocha angependa kuwa naye katika kikosi chake kutokana na uzoefu aliokuwa nao katika michuano mbalimbali barani Ulaya. Ideye mpaka sasa amefunga mabao 74 katika mechi 182 alizoichezea Dynamo Kiev.