UNITED KUMKOSA SHAW MECHI YA UFUNGUZI YA LIGI KUU.

KLABU ya Manchester United imedai kuwa beki wake Luke Shaw anatarajiwa kukosa mwanzo wa msimu wa Ligi Kuu na anaweza kukaa nje ya uwanja kwa muda wa wiki nne baada ya kupata majeraha ya msuli. Beki huyo wa kushoto mwenye umri wa miaka 19 ambaye alitua Old Trafford akitokea Southampton Juni kwa ada ya paundi milioni 30 bado hajacheza mechi yoyote ya kimashindano na United. Shaw ambaye alikuwa sehemu ya kikosi cha Uingereza kilichoshiriki Kombe la Dunia huku akicheza mechi yake ya tatu kwa nchi yake katika mchezo uliomalizika kwa sare dhidi ya Costa Rica, alikosa mechi ya mwisho ya kirafiki ya United dhidi ya Valencia iliyochezwa juzi. Nyota huyo itabidi asubiri mpaka baada ya mwezi ndio aweze kucheza mechi yake ya kwanza na meneja mpya wa United Louis van Gaal sasa anaumiza kichwa kufuatia kuondoka kwa beki wa kushoto mzoefu Patrice Evra aliyehamia Juventus. United itajitupa katika uwanja wake wa nyumbani Old Trafford Jumamosi hii kuchuana na Swansea City.