MESSI AMPIGA BAO RONALDO KWA KUMTANGULIA KUFIKIA REKODI YA MABAO YA RAUL LIGI YA MABINGWA.

MSHAMBULIAJI nyota wa klabu ya Barcelona Lionel Messi amefanikiwa kufikia rekodi ya mabao ya Raul aliyoweka katika michuano ya Ligi ya Mabingwa Ulaya baada ya kufunga bao lake la 71 jana. Nyota huyo wa kimataifa wa Argentina alifunga mabao mawili katika mchezo dhidi ya Ajax Amsterdam na kufikia rekodi ya nguli huyo wa Real Madrid. Mabao ya jana ya Messi yaliihakikishia Barcelona ushindi wa mabao 2-0 katika mchezo wao wa kundi F. Nyota wa Madrid Cristiano Ronaldo ambaye alikuwa nafasi ya kufikia rekodi hiyo kama angefunga katika mchezo wao wa juzi dhidi ya Liverpool sasa anakuwa katika nafasi ya tatu katika orodha hiyo akiwa amefunga mabao 70. Mshambuliaji wa zamani wa klabu ya Manchester United Ruud van Nestelrooy anashikilia nafasi ya nne akiwa na mabao 56 huku nafasi ya tano ikishikiliwa na nguli wa Arsenal Thierry Henry ambaye amefunga mabao 50.