MHOLANZI PLUIJM KUCHUKUA MIKOBA YA MAXIMO YANGA.

KOCHA Hans van der Pluijm raia wa Uholanzi amewasili rasmi jijini Dar es Salaam Alfajiri ya kuamkia tayari kuanza kibarua chake cha kuitumikia timu ya Yanga ambayo imemtimua rasmi kocha wake Marcio Maximo jana. Maximo ametimuliwa kutokana na kushindwa kuafikiana na uongozi katika baadhi ya masuala huku mchezo wa Nani Mtani Jembe ambao walifungwa na Simba mabao 2-0 nao ukitajwa kuwa chanzo. Kwa mujibu wa habari zilizopatikana Pluijin anatarajiwa kufanya kazi na aliyekuwa msaidizi wake wa awali kabla ya hajaondoka Yanga ambaye ni Charles Boniface Mkwasa. Wakati huohuo, klabu ya Yanga imemuacha Mbrazil Emerson de Oliviera na kumsajili mfungaji bora wa Ligi Kuu Tanzania Bara Amisi Tambwe anayetoka Burundi. Tambwe ambaye aliichezea Simba msimu uliopita akitokea Vital’O ya Burundi amepewa mkataba wa mwaka mmoja huku Emerson akiachwa kutokana na na kushindwa kupatikana hati yake ya uhamisho wa kimataifa-ITC.