PELLEGRINI AANZA KUTAMBA BAADA YA KUISHIKA CHELSEA.

MENEJA wa klabu ya Manchester City, Manuel Pellegrini amekipongeza kiwango cha timu yake na kukielezea kama maajabu ingawa anaamini bidii ndio imekuwa chachu kubwa ya kufanikiwa. Mabingwa hao wa Ligi Kuu wameshinda mechi nane mfululizo katika mashindano yote na kufanikiwa kufuzu hatua ya mtoano ya Ligi ya Mabingwa Ulaya huku wakilingana alama na Chelsea kileleni mwa msimamo wa ligi. City imekuwa ikicheza katika kiwango cha juu pamoja na kuwa na majeruhi kama Danid Silva, Vincent Kompany na Sergio Aguero na kocha huyo anadhani kuwa kikosi chake kilistahili mafanikio hayo. Akihojiwa Pellegrini amesema hajui kitu gani Chelsea wanafikiria kwani wiki tatu zilizopita walikuwa nyuma yao kwa tofauti ya alama tisa huku wakikaribia kuenguliwa katika michuano ya Ligi ya Mabingwa Ulaya lakini mambo yamebadilika. Kocha huyo aliendelea kudai kuwa kubadilika kwa City ni kama maajabu lakini katika soka maajabu yana jina lake ambalo ni kufanya kazi kwa bidii.