TAARABT AMPA MAKAVU LIVE BALOTELLI.

MSHAMBULIAJI wa klabu ya Queens Park Rangers-QPR, Adel Taarabt amemponda Mario Balotelli baada ya kudai kuwa mshambuliaji huyo wa Liverpool hana hadhi ya kuwa mmoja kati ya wachezaji bora duniani. Nyota huyo wa kimataifa wa Morocco alicheza nusu msimu kwa mkopo akiwa AC Milan ambako alicheza sambamba na Balotelli kabla ya Muitaliano huyo hajasajiliwa na Liverpool mwanzoni mwa msimu huu. Taarabt pia alirejea Uingereza mwanzoni mwa msimu lakini amekuwa akifanya mazoezi mwenyewe kufuatia kurushiana maneno na meneja wa QPR Harry Redknapp. Mshambuliaji huyo amethibitisha taarifa za hivi karibuni zilizotolewa nchini Italia akikiri kuwa amepanga kurejea Serie A na ataichezea Milan bure. Katika mahojiano yake na luninga ya Sky Sport Taarabt alimponda Balotelli akidai anashangaa watu wanavyomwambia kwamba ni mchezaji mkubwa kwani yeye anamuona wa kawaida sana.