ENRIQUE ATETEA KUMCHEZESHA MESSI KAMA WINGA.

KOCHA wa klabu ya Barcelona, Luis Enrique anaamini Lionel Messi anacheza vyema zaidi kama winga katika mfumo wake wa sasa baada ya nyota huyo kufunga bao la ushindi katika ushindi wa mabao 3-2 dhidi ya Villarreal jana. Katika mchezo huo Barcelona walikuja kutoka nyuma mara mbili kabla ya kupata ushindi huku Neymar, Rafinha na Messi wakiwa wafungaji huku mabao ya wapinzani wao yakifungwa na Denis Cheryshev na Luciano Vietto. Kawaida imezoeleka Messi kucheza namba nane au tisa lakini katika mchezo wa jana Enrique alimchezesha nyota huyo kama winga na kutetea uamuzi wake huo kwamba ndio uliomfaa kutokana na mfumo aliotumia. Enrique amesema alimpeleka kucheza nafasi ya winga lakini alimpa uhuru wa kuhama kwani walikuwa wanataka agues mpira mara kwa mara jambo ambalo limefanya kazi na kuwapa matokeo waliyohitaji. Kwa mara nyingine Luis Suarez alishindwa kufumania nyavu pamoja na kuwekwa kama mshambuliaji wa mwisho na kukosa nafasi kadhaa alizotengenezewa hivyo kumfanya kuwa amefunga mabao matno pekee katika mechi 18 za mashindano yote alizocheza. Lakini alitetewa na Enrique akisisitiza kuwa mchango aliotoa Suarez ni mkubwa kuliko kama angekuwa amefunga mabao.