INZAGHI ADAI WACHEZAJI WAKE BADO WAOGA.

KOCHA wa AC Milan, Filippo Inzaghi amesema bado kuna hofu miongoni mwa wachezaji wake baada ya kufanikiwa kuitandika Parma kwa mabao 2-1 katika mchezo uliofanyika katika Uwanja wa San Siro jana. Inzaghi aliingia katika mchezo huo akiwa chini ya shinikizo kubwa la kuepuka kipigo cha tatu mfululizo ambacho kingeweza kuweka kibarua chake rehani. Kocha huyo amesema pamoja na ushindi waliopata lakini anadhani wachezaji wake walikuwa bado na hofu huku wakiwa hawajiamini hivyo bado kuna kazi kubwa ya kufanya. Inzaghi aliendelea kudai kuwa kinachohitaji sasa ni kuhakikisha wanazidi kuimarika na kujenga hali ya kujiamini zaidi ili waweze kufanya vyema katika mechi zao zijazo. Matokeo hayo yanawafanya Milan kubakia katika nafasi ya nane katika msimamo wa Serie A huku wakikabiliwa na mchezo dhidi ya vinara Juventus mwishoni mwa wiki hii.