MESSI APIGA HAT-TRICK YA 23 LA LIGA.

MSHAMBULIAJI nyota wa Barcelona, Lionel Messi jana amefunga hat trick yake ya 23 katika mechi 300 za alizocheza wakati timu hiyo ilipoisambaratisha Levante kwa kuinyuka mabao 5-0. Matokeo hayo yanamaanisha Barcelona wamepunguza pengo la alama kufikia moja nyuma ya vinara Real Madrid ambao nao waliifunga Deportivo La Coruna Jumamosi iliyopita. Katika mchezo huo Messi alifunga mabao yake katika dakika ya 38, 59 huku akifunga lingine la penati dakika ya 65. Mbrazil Neymar ndiye aliyefungua pazia la mabao kwa kufunga bao la kuongoza katika dakika ya 17 huku Luis Suarez akifunga bao la aina yake kwa tik tak dakika ya 73. Barcelona sasa inakuwa imefikisha ushindi wake wa 11 mfululizo katika mashindano yote na kufikia rekodi ya msimu wa 2008-2009 wakiwa chini ya kocha Pep Guardiola.