RONALDO AMTUKANA MWANDISHI BAADA YA KIPIGO.

MSHAMBULIAJI nyota wa Real Madrid, Cristiano Ronaldo ameonyesha kugadhabishwa kufuatia kipigo cha mabao 4-0 walichopata kutoka kwa mahasimu wao Atletico Madrid kwa kumfokea mwandishi wa habari. Vinara hao wa La Liga walipata kipigo hicho kizito kwa mara ya kwanza toka walipolazwa na Barcelona kwa mabao 5-0 mwaka 2010. Ronaldo alionyesha hasira zake za wazi baada ya mchezo huo wakati alipoulizwa swali na mwandishi kuhusiana na mchezo uliopita dhidi ya Cordoba ambao ulifanyika Januari 24. Nyota huyo alimwambia mwandishi kuwa hana akili kwasababu anataka kuzungumzia mchezo ambao umepita kipindi kirefu badala ya kuzungumzia mchezo wao wa jana.