ARSENAL WAAGA CHAMPIONS LEAGUE, ATLETICO APITA KWA MBINDE.

MENEJA wa klabu ya Arsenal, Arsene Wenger amewapongeza Monaco baada ya kuwatoa katika michuano ya Ligi ya Mabingwa ya Ulaya kwa bao la ugenini jana. Pamoja na kuifunga Monaco mabao 2-0 lakini walishindwa kusonga mbele kutokana na kuzidiwa bao la ugenini pamoja na kutoka sare ya mabao 3-3 katika michezo miwili waliyokutana. Huu unakuwa msimu wa tano mfululizo Arsenal wanatolewa katika hatua hii na Wenger analaumu makosa katika mchezo wao kwanza waliofungwa mabao 3-1 kuwa ndio chanzo cha wao kutolewa. Wenger amesema siku zote ni vigumu kushinda mabao matatu lakini anawapongeza wachezaji wake kwa kutumia kila nafasi huku akiwasifu wapinzani wao kwa kujilinda vyema. Katika mchezo mwingine wa michuano hiyo uliochezwa jana Atletico Madrid nao walifanikiwa kusonga mbele kwa changamoto ya mikwaju ya penati baada ya kumaliza muda wa kawaida na ule wa nyongeza wakiwa sare ya bao jumla ya bao 1-1. Leo timu zingine mbili zitakuwa zikigombea nafasi ya kutinga robo fainali ambapo katika mchezo wa kwanza Barcelona watakuwa wenyeji wa mabingwa wa Ligi Kuu Manchester City huku Borussia Dortmund ya Ujerumani wakiwakaribisha mabingwa wa Italia Juventus.