CITY NAO WAAGA MESSI AKIFANYA MAAJABU YAKE.

TIMU pekee ya Uingereza iliyokuwa imebakia katika michuano ya Ligi ya Mabingwa Ulaya, Manchester City jana nayo iliyaaga mashindano hayo kwa kuchabangwa bao 1-0 na Barcelona katika mchezo wa marudiano hatua ya timu 16 bora. Bao pekee katika mchezo huo liliwekwa kimiani na Ivan Rakitic aliyemalizia kazi murua ya Lionel Messi, huku golikipa wa City Joe Hart akiibuka shujaa kwa kuokoa michomo mingi ya wapinzani wao. Barcelona wametinga hatua ya robo fainali ya michuano hiyo kwa kushinda jumla ya mabao 3-1 katika mechi miwili waliyokutana baada ya kuichapa City kwa mabao 2-1 katika mchezo wao wa kwanza. Katika mchezo mwingine uliochezwa jana mabingwa wa Italia Juventus nao walitinga robo fainali kwa kishindo baada ya kuichapa Borussia Dortmund kwa mabao 3-0 na kusonga mbele kwa jumla ya mabao 5-1. Juventus waliifunga Dortmund kwa mabao 2-1 katika mchezo wao wa kwanza uliochezwa jijini Turin wiki mbili zilizopita. Ratiba ya mechi za robo fainali sasa inatarajiwa kupangwa kesho katika makao makuu ya Shirikisho la Soka la Ulaya-UEFA yaliyopo jijini Nyon, Ufaransa.