WENGER ADAI USHINDI DHIDI YA MAN UNITED UTAWAONGEZEA MORALI WACHEZAJI WAKE.

MENEJA wa klabu ya Arsenal, Arsene Wenger anaamini kuwa mchezo wao wa leo wa robo fainali ya Kombe la FA dhidi ya Manchester United utakuwa muhimu kwa kikosi chake wakati wakijiandaa katika wiki za mwisho wa msimu. Arsenal ambao ndio mabingwa watetezi wa kombe hilo wanaifuata United katika Uwanja wa Old Trafford wakiwa katika kiwango kizuri kwa kushinda mechi 10 kati ya 12 za mashindano yote walizocheza. Pamoja na kuwa na nia ya kutetea taji lao hilo, Arsenal bado wako katika michuano ya Ligi ya Mabingwa Ulaya huku pia wakipambana kuhakikisha wanamaliza katika nafasi za nne za juu katika Ligi Kuu. Akihojiwa Wenger amesema mchezo huo ni mkubwa na kama wakishinda litakuwa jambo muhimu kwa mechi zao zinazofuata. Kocha huyo aliendelea kudai kuwa kunyakuwa taji la FA msimu uliopita kuliwapa nguvu kwasababu walikuwa wamekaa miaka kadhaa bila taji lolote.