DI MATTEO AKIRI KUFUZU LIGI YA MABINGWA ULAYA ITAKUWA NGUMU KWA SCHALKE.

MENEJA wa klabu ya Schalke, Roberto Di Matteo amekiri matumaini yao ya kufuzu michuano ya Ligi ya Mabingwa Ulaya msimu ujao yameyeyuka baada ya kutoka sare ya bila kufungana na Freiburg katika mchezo wa Bundesliga uliochezwa jana.Matokeo hayo yanaiacha Schalke katika nafasi ya tano katika msimamo wa ligi lakini wakiwa nyuma kwa alama 10 kufikia nafasi nne za juu ambazo ndio zitawafanya kufuzu michuano hiyo msimu ujao.Schalke wamefanikiwa kutinga katika hatua ya mtoano ya michuano Ulaya katika kipindi cha miaka minne iliyopita huku wakitinga nusu fainali mwak 2011 na kutolewa na Manchester United. Msimu huu Schalke waliwararua mabingwa watetezi michuano hiyo Real Madrid kwa mabao 4-3 nchini Hispania lakini walikuja kuondolewa kwa matokeo ya jumla ya mabao 5-4 katika mechi mbili walizokutana. Akihojiwa mara baada ya mchezo huo, Di Matteo amesema sare hiyo imefifisha matumaini ya kucheza Ligi ya Mabingwa haswa kutokana na michezo iliyobakia kabla ya msimu kuisha.