VAN GAAL AANZA KUJIGAMBA BAADA YA KUICHAPA CITY.

MENEJA wa klabu ya Manchester United, Louis van Gaal anaamini kikosi chake kinastahili pongezi baada ya kushinda mechi yao ya sita mfululizo ya Ligi Kuu kwa kuwachapa mahasimu wao Manchester City. Mabao ya Ashley Young, Marouane Fellaini, Juan Mata na Chris Smalling yalitosha kuihakikishia United ushindi wammabao 4-2 hivyo kuwafanya kuwazidi City waliopo nafasi ya nne kwa alama nne. 

Mbinu za Van Gaal zimekuwa zikikosolewa na wengi toka alipotua Old Trafford, ingawa Phil Jones alidai jana kuwa kikosi chao kimeanza kuelewa jinsi gani Mholanzi huyo anataka wacheze. Akihojiwa Van Gaal amesema wamepiga hatua kubwa katika mechi sita zilizopita kwasababu ya baada ya kufungwa na Arsenal katika mchezo wa Kombe la FA ilikuwa ngumu kwa kikosi chake kusisimama na kuendelea kuwa na imani na mbinu zake. 

Kocha huyo aliendelea kwa kuwapongeza wachezaji kwasababu wameweza kufanikiwa kuelewa mbinu zake chini ya shinikizo kubwa kutokana kwa mashabiki ambazo siku zote wanataka timu yao ishinde. Van Gaal pia alimpongeza Young kwa mchezo wa mzuri baada ya kufunga bao la kusawazisha na kutengeneza mengine mawili katika mchezo huo.